搭順風車，彷彿只是背包旅客的事情，或電影書本裏的情節。
上月在facebook卻出現一個叫「順風車」的群組，號召在香港推行順風車運動；留言版好不熱鬧，有徵車的、有車主提供時間路線、有人直接走到街頭豎起大拇指，有人還帶着孩子在路邊舉牌，或成功或失敗，都是樂在其中。
告訴朋友，反應兩極。跟筆者一樣唔識死的說：「咁得意？真係work架？」好有興趣點截法；另一種覺得傻的嗎，「畀人打劫點算？點知佢載我去邊？」嗯。
找到開設這群組的豪仔，曬得黑黝黝的他去年以順風車為主要交通工具環遊中國，坐上了癮，回來後還是常常在路邊舉起拇指碰運氣，好多個晚上，在香港各處街頭遇上豪爽的司機大哥義載回家，甚至假日隨心在公路兜截上車就跟人家去了燒烤游泳。
一雙腳
跑世界 拉近人情
除了享受省錢省時、不期而遇的高興，豪仔想得更深沉。花錢搭車，太容易了。在這凡事用錢解決的社會裏，我們買商品買服務，一手交錢一手交貨，方便快捷，卻被切割成冷漠疏離的個體。能否重拾一種與錢無關的合作和默契？「事實就是車上有空餘座位，反正順路，反正都係要用咁多油，點解唔載多個人、傾兩句偈？」在豎起的大拇指之前、停車與不停車之間，人試圖與另一人建立聯繫。車門打開，人情故事得以分享；愛沉默的，就安靜共處幾公里。
從今天起，不如嘗試信任路人？
豪仔第一次搭順風車，還沒想得這麼多，純粹是睡過頭。那是○三年的事了，當時在大嶼山擔任救生員（現在則是游泳教練），上班要由東涌坐巴士往下長沙，不料一睡醒已到貝澳，急忙下車，等巴士坐回頭至少要半小時，一定遲到，唯有嘗試舉手截車，迎面而來第一架車就停低了，是架泥頭車，「我簡單講句『師傅呀我想去下長沙，遲到了』，佢就話『上車啦』，沿途無乜點傾偈，最後『到喇』、『唔該晒』咁就落車，好純粹件事。」
之後很久都沒再截順風車。二○一一年三月，豪仔車禍撞斷了腳，要在家休息半年，悶得發慌，「以前好鍾意買嘢，同時下年輕人無乜分別，換電話就少，主要是買衫褲鞋襪。但係住在醫院十八日，十八日都無得冲涼，日日躺在牀上，食飯三餐有人供應，耐唔耐有阿姐畀衫你換，有條毛巾抹身，我發覺，原來生存只係咁簡單。有錢都無用，有工返唔到，又搵唔到錢、又使唔到錢，日日都著住套醫院衫，屋企衣櫃有好多自己鍾意的衫都著唔到，咁啲衫對我嚟講有咩意思呢？原來每日著同一套衫其實無乜問題。咁有咩係重要的？只有思想。時間係咁過，每日就睇書、上網、諗嘢。」
除了對生活、對社會的各種反省，豪仔腳斷走不動，特別想滿世界跑。讀過台灣青年踏單車遊西藏的流浪記《轉山》，又看北京旅遊衛視《行者》一輯十集的「搭車去柏林」紀錄片，「講一個北京的旅行家，想去柏林搵佢的德國女朋友，於是開始了這順風車計劃，佢朋友一路隨行拍攝」。看完自己也很想走一趟，拍輯香港版的，腳傷痊癒，便周圍寫計劃書寄給電視台、媒體，「我想有人同行，所以搵贊助商support，即使只是心靈上都好，最後搵到突破，願意借部機畀我去拍，同埋旅途上有事可以打返去，佢哋會提供支援」。
大拇指
截便車 按快門 遊中國
結果豪仔去年二月出發環遊中國，初時一人上路，拿着攝錄機隨便拍，後來遇上山西青年周峰，結伴同行，主要截順風車，除非大風大雨、天氣惡劣到停留在公路上截車有危險，才會用錢搭車。二至四月走了中國東邊的一半，錢花光了，唯有回港賺錢，到九至十二月兩人再會合，完成中國西部的另一半旅程。中途在港的幾個月，體驗一樣深刻，「因為無晒錢，我在『佔領中環』瞓，識到來自美國的流浪者阿Mark，佢帶我去執超市每晚掉出來的新鮮食物，自己食、派畀露宿者、帶返中環分享，都仲有剩，於是同一班朋友組織起『豐剩』（一個剩食回收團體），仲有搭順風車、交換舊衫著，乜都試晒，大概有兩個月的時間，我一蚊都無用過，原來生活係可以唔用錢的。」在佔領中環的營地，豪仔還遇上在香港流浪七天的中大學生Kiki，愈發明白，其實流浪與地域無關，重點是有一顆迎接「未知」的心，「美國又好、巴黎又好、中國又好，即使在自己生活的城市都可以，只要你肯行出去，世界就有任何可能性，你不斷走，沿途就會有各種未想像過的事情發生。」
旅行回來，豪仔決定發起「順風車」群組，希望更多人嘗試打開對生活的想像。群組開了個幾月，有六百多人加入，乘客和司機紛紛留言寫下平時慣行的時間路線，尋求配對，也有人直接出街截車並交流心得。有司機懊惱過往沒接載陌生人的觀念，錯過了幫助別人的機會；也有司機說曾在偏遠村路上見有人獨行，提議順道接載他們，不料人家都抱着戒心不願上車；有年輕媽媽覺得意念很好，帶着小朋友在路邊舉牌截車，回來開心分享經驗，卻遭親友指摘，「成日話上了壞人車點算？思想太負面了，點解唔試過先去討論好定唔好呢？」
重構人與人之互信
豪仔認為，我們的「危險意識」，其實大部分都是被社會和媒體灌輸而成的，「由細到大都叫我們小心別人，唔好接受別人的分享，幼稚園老師、父母叫我們小心街上的人，唔好食人地畀你的糖，成長過程中『不相信』、『不接受』的觀念成為習慣，媒體和朋友間都愛流傳壞人的故事，因為夠聳人聽聞，而且當權者利用恐懼控制人民，愈是宣傳負面資訊，人與人之間愈是冷漠和難以團結。」他認為壞人是有，但不需要想像到滿街都是，自己在大陸旅行時截車，也會抱着正常的防備意識，從言談對話間觀察，「其實一個人係咪好人，你會feel到的嘛，全世界咁多人截順風車，我聽過出意外的新聞都唔超過三單，比例上可能仲少過一般落街畀人打劫。當然，在中國和香港，順風車未流行，流行之後唔排除會有壞人利用這機會去做壞事，但我不希望以這方式去諗。我推動順風車就是想打開一個空間，讓人思考安全和人與人的關係，愈是避開，愈無法打破冷漠，也就更加無信任，社會只會更危險。」
一顆心
施與受 分享買不到的東西
在旅途上，豪仔也發現，施與受之間，人們常常抗拒做接受的一方，覺得不好意思「白坐」別人的順風車，「甚至我去到山區旅行，想除低件衛衣畀個好窮的人，佢都會話唔使啦，一係我畀返十蚊你。人們好似覺得『有來有往』就只是個體之間的來往，你請我食一餐飯，我下次就要請返你食一餐飯，佢無諗過可以將這變成群眾之間的來往，你請我食一餐，我咪請佢食一餐，佢又可以再請另一個人食。像周峰被人偷了電話，我話你不如上網徵一部，佢寫旅行經歷放上網，好多fans的，肯定有人願意買返部智能手機畀佢。但佢覺得唔好意思，唔想拎別人的東西。我話點解要唔好意思？你去旅行係有需要睇手機地圖嘛，如果你將部手機睇成唔係你的，你只是借用、暫用，最終會用佢貢獻返個社會，你就不是佔據了別人的東西，你可以通過各種途徑將佢轉化畀返其他人。當然，我們無乜可能搭完順風車，就買架車去載返其他人，但你可以透過其他行動，例如將經歷寫成歌、講故事、分享食物，咁樣將你受益的畀返個社會。但好多人唔會咁諗，佢寧願每月由銀行自動過戶五十蚊畀慈善團體幫助非洲人，或者去教會探戒毒青年，就算佢自己內心都可能千瘡百孔，但佢唔會覺得自己需要輔導和探望的，我輔導人就得，我心理無問題；或者我已經夠富足了，唔需要人畀嘢我，因為我有錢，可以買。人們寧願選擇畀錢，一手交錢一手交貨，兩不相欠，各行各路。」
自由公共空間 連繫人與人
我說豪仔的想法很《雲圖》——我們的生命不屬於自己，世間萬物也是大家的，所有生命是個共同體，互相影響。豪仔笑說還未看這套戲，但世界應該是這樣；若認為搭順風車危險，大家可以弄一個順風車apps之類，收益撥入基金，有意外時補償受害者的損失，「因為這問題不是警察拉到人、坐了監就解決的，應該共同享受資源，共同承擔責任」。現時街頭愈來愈少讓人們建立連繫的地方，很多地方被私有化、劃成禁區，「在香港截車時常發現，有些路是巴士專用停車線、商場和私人住宅專用區，路上好多其實唔係咩危險位置、夜晚又無乜人，都劃成二十四小時禁區，不准停車。唔能夠停下就意味着不能在那裏對話和發生人際關係，我們要揀佢劃剩的地方才可以截順風車。」網絡給予我們一個平台開展、建立連繫，但豪仔最終希望是可以奪回更多自由的公共空間，「或者有一日可以在街上豎個牌設成『順風車站』，每個想搭順風車的人就在那裏排隊，司機又可以兜過來睇有無人順路上車；或者我們可以設立無線電的順風車平台，或者可以住同一區的人夾錢買架巴士，決定每日行咩路線，乜都得㗎。」豪仔好記得《行者》每集片尾打出這句話：「如果你真的想做一件事，全世界都會幫助你」，說到底，沒有不可能，只有不敢想。
轉載自明報2013年3月10日