破解狗狗口腔健康10大迷思「下」

上次post完破解狗狗口腔健康10大迷思「上」之後，收到好多回覆！哎呀！原來大家仲有好多迷思未破解架！

主人：「狗狗嘅口水有細菌，咁唔好再俾佢舐自己個鼻喇」

狗狗鍾意舐濕自己個鼻係為左俾鼻上嘅細胞接觸到更多氣味分子，以保持嗅覺靈敏。雖然有細菌，但如果你唔俾佢舐嘅話，佢就聞唔到任何氣味架喇！！！

主人：「所有狗狗都唔鍾意刷牙架啦！唔好迫佢地啦！」

大錯特錯呀！狗狗唔鍾意嘅係刷牙為佢地帶來嘅不適感，其實只要從小為狗BB培養刷牙習慣，狗狗就可以好快適應到刷牙架喇！為左狗狗嘅健康着想，呢啲野點都要迫下架喇～

主人：「我隻狗狗唔刷牙個口都唔臭喎，咁即係好健康唔使刷都OK啦！」

狗狗個口唔臭唔等於乾淨架，如果因為冇異味而長期忽略狗狗嘅口腔或者牙齒健康，狗狗好可能會患上牙周疾病架！輕則牙痛同食慾不振，重則甚至會有生命危險。

主人：「狗狗牙痛嘅話一定好唔舒服架嘛，我地一定會睇得出啦！」

普遍嚟講，狗狗嘅忍痛能力非常高。所以狗狗身上有任何痛症，主人好難察覺到。想知狗狗到底健唔健康就要睇番「狗狗健康4步曲」，幫狗狗檢查一下喇！

主人：「就算係冷氣房入面，狗狗都成日流口水，唔通佢真係咁怕熱？」

當然唔係啦，其實流口水同氣溫環境冇關係架！無時無刻都不停流口水係狗狗蛀牙同牙周病嘅先兆，遇到呢種情況記住帶狗狗去睇醫生，儘快求醫呀！　

－－－－－－－－－－－－－－－－－－－－－－－－－－－－－－－－－－－－

圖片來自網絡。文章已編輯，原文出處：http://dogdogoralhealth.blogspot.hk/2015/08/10_19.html